من طرف مربعات الأبنودى
حِلِمْت بِيكِى صَبِيَّة لابْسة تُوب أخضَرْ
وِسْط المُدُن والمَزَارِعْ ماشية نَشْوَانَة
حَوالِيكى قَعَد الرَّبِيع تحت النَّسيم يِسْكَر
وِصْحِيت لَقِيتِك عَجوزَة شَمْطَا عِرْيانة!!
قُمْنَا بِثَورة لاجْل نِنْقِذِ الوطن
وكان أمَلْنا نِحْمِله لِصَباحْ بِعيد
وادِينا واقْفِين تانى فِى نَفْس العَفَنْ
مِتْحَفِّزين لِلثَّوْرة تَانِى مِن جِدِيد!!
الغُرْزَة مَنْصُوبَة وآخِر مَنْجَهَة
حتَّى اللى مِش مَسْطُول سَطَلْناه زَيِّنا
(أثيوبْيا) كانت ضِدِّنا لِوَحْدهَا..
دِلوقْت أفريقيا بِحالْها.. ضِدّنا!!
الضِّحْكة هازّة الحكومة
اِوْعَى تِسَايِسْهُم
وسَجَّانِينَك يا «دُومة»
بُكرَة حَتِحْبِسْهُمْ!!
دَايِر يِبِيعْنا لِلتُّرْك وِالْفُرْسْ
وِمَافيشى بِيعَة مَالْهَاشْ عُمُولةْ
بِيْقولوا «دَا» اللِّى رَاحْ يِفْتَح القُدْسْ
لاَ هِى القْدس يا ابْنِى قْزَازِةْ كَاكُولا..!
تركيا فْ وِسْط الْمِيدَان
تِضْرَب الشُّبَّان وِتُجْزُرْ
وَادِى صَاحْبَكْ (أَرْدُوغَانْ)
أرْدَغِتْ وَيَّاهْ يَا (دُكْتورْ)!!
